“البيت بيتك “..صنع في السودان 🇸🇩
بقلم :::هدي العليش
مامجرد ضيافه …
هي دستور سوداني مكتوب في القلوب قبل الحيطان.
يعني ادخل برجلك اليمين وانت مطمئن
بابنا فاتح سريرنا مفروش، الموية باردة، الشاى والزاد مقسوم ، وقلبنا قبل داك .
عبارة صنعت في السودان …..
في الحله في الحي و الفريق اتعلمها الولد من ابوه” الضيف دا امانه ”
اتعلمتها البنت من امها :زيدي الصينيه شويه معانا ضيف علامه تعجب !
عندنا الضيف مابسألوه” جاي من وين ؟”
بسألوه كيف الاهل “واتغديت ؟”
عندنا الغريب لوبات ليلتين بقي من الاهل .
“البيت بيتك ” دي الهويه السودانيه .
مابنقفل الباب ولا بنحسب اللقم لانو الكرم مانقص مال ….الكرم يزيد البركه في الرزق .
لذلك تلقي السوداني في الغربه اول مايشوفك يقولها اتفضل “البيت بيتك ”
لوماعنده بفتح قلبه وهو مابعرفك .
هي عبارة صنعت في السودان، واتصدرت للعالم كله. ماركه سودانيه مسجله عنوانها: الجود ،السماحه ، .
اتساع الصدر .
تظل مامجرد جمله ترحاب وضيافه بل هي عقد محبه مكتوب على باب كل بيت سوداني .
عشان كدا اي سوداني ماشي في الدنيا شايل العبارة دي في جيببه يفرشها وطن وين مامشى .
السوداني يقول ليك ارتاح كانك في بيتك .
مرحب بيك في اي وقت البيت بيتك 🏤🧡
البيت بيتك
هويه ….ادب …محبة
البيت بيتك يعني المفتاح في يدك .
مرحبا بيك دايما في بيتك
ودعتكم الله